何超儀慳自己名錶冧老公
「血拼」乃女人專利，何超儀日前便發揮了女人這個小宇宙，披上長披肩，於中環血拼，剛續約珠寶公司的超儀，呢頭收錢嗰頭便出血，短短半小時的閒逛，便豪花二百萬元！
雖然超儀身價不菲，但絕不胡亂使錢，日前她到代言的景福珠寶公司試戴今日出席記者會簽約儀式的手錶時，便發揮「太太本色」，精明消費，除了不時徘徊特價櫃位睇首飾之外，仲講價講到口水乾，要不時飲茶順氣。
三人服侍顯尊貴
而超儀「血拼」的方針，是豪人不豪自己，睇女士首飾，只看一些價值二十、三十萬元的粉紅、黃鑽鏈，但在男士專櫃便看上價值一百五十萬元的Patek Philippe錶，該品牌的錶多年來都是各大拍賣行十大貴價錶之一，屬殿堂級數，超儀拿着錶左看右看，十足收藏古玩的專家一樣，最後，超儀一口氣買下兩條共價值四十多萬元的鑽石頸鏈，以及一隻價值一百五十萬元的Patek Philippe手錶，該手錶應該是送給老公陳子聰。
超儀在血拼之前，曾試戴今日亮相記招時佩戴的卅幾萬元魔鬼魚皮手錶，未知是否魔鬼魚皮太硬，令超儀一度除不到，場面有點尷尬，三位珠寶店職員即上前幫忙，盡顯超儀的尊貴地位！
其實超儀跟珠寶店合作已第三年，她每年都會「獲利回吐」，經常不要贊助，自掏腰包買首飾，好像早前超儀出席公開場合時所佩戴由三百顆鑽石砌成的3D立體鑽石指環，以及女運動員最愛佩戴、號稱不易折斷的幼金手鏈，都是超儀自己掏荷包購買，如此識撈，難怪深得廣告商寵愛年年續約。
買心頭好當保值
記者日前致電超儀，問她是否續約珠寶店代言人，酬金甚豐厚，所以半粒鐘豪花二百萬元，超儀說：「酬金係滿意價啦，買首飾買錶，係因為我做咗代言人之後，對手錶、首飾產生興趣，亦請教過屋企人，發現一啲難搵嘅鑽石、出名嘅名錶都好保值，所以嗰日買咗啲作收藏啫。」
文：影視組