MonsterBeez日日踩場剃貿發局眼眉

周秀娜（Chrissie）決定跟貿發局抗衡到底，在書展開鑼當天，殺入會展其他會場舉行簽名會，其他o靚模後輩亦絞盡腦汁搞對抗，尹蓁晞曾表示以cosplay扮相踩場、組合冬甩亦會在書展派冬甩，令貿發局為之「冇符」。

SugarBeez水手裝招搖

由Annie G.及Hailey C.組成的MonsterBeez，在寫真集有超激演出，兩女激咀摸胸，性感度爆燈。兩女直認屆時會踩場谷寫真：「我哋日日都去，日日玩『捉伊人』。（着乜衫？）着乜都好，一定唔會着比堅尼跳嚟跳去，但會捐窿捐罅去其他攤位執平嘢。（唔擔心釀成混亂？）未見過書展有秩序過，除咗收舖嗰陣！」

至於A.Lin和DaDa Lo組成的SugarBeez，亦會去書展：「啲人愈唔畀愈要去，香港唔係封建城市。（邊日去？）書展第二日，會着水手裝去，切合我哋寫真主題。」還笑言希望可以呃到以學生門票入場。會應fans要求簽名及握手，並不擔心引來混亂。

另外，陳嘉寶（Anjaylia）和蔡穎恩（Evelyn）亦於23日下午到書展撐場：「會以青春少女打扮入場，仲會睇埋其他攤位，唔怕造成混亂，嗰日只係握手同合照，唔會簽名。」

Evelyn會以少女打扮入書展。

尹蓁晞會以cosplay造型谷行33C身材踩場。

E神Carol入櫃位賣書

近日人氣急升的「浸大E神」Carol，亦明刀明槍殺入書展，頭兩日會在中午時分以普通市民身份名正言順行入去，她選擇背心短褲作戰衣，驚人多逼親，公司正安排幾名保安保護，屆時Carol會在櫃位幫手賣書：「貿發局唔畀我簽，冇話唔畀我賣書，同埋我會送親筆簽名海報畀頭一百個fans，若fans要求簽書合照都會照做。」

而「警鐘模」Jessica C.不排除以普通市民身份入場，因經理人告知曾有女藝人被非禮，她擔心安全問題，但不會在書展第一日入場，只是想同fans接觸。

對於眾o靚模奇謀盡出混入書展，貿發局發言人張先生受訪時表示關注，但不想講太多：「書展係開放嘅，任何人士作為觀眾都有權入場，當然一定會關注o靚模，因為人流咁多，我哋要控制秩序，但關注唔代表會禁制佢哋，希望任何人入書展會守規矩。（衣着呢？）社會可以接受嘅衣着，呢樣冇規定。」對於Chrissie在會展另一場地簽名，張先生不作評論，無謂為人宣傳。

Jessica C.會以普通市民身份入場。

周秀娜去年攻陷書展，場面相當墟冚。

文：專案組