樂基兒代解畫︰早餐前先飲水
「金句王」黎明的太太樂基兒昨日出席活動時，向記者解釋黎明其中一句金句「唔好空肚食早餐」之意思，破解多時謎團，黎明嫂果然好嘢！
黎明嫂樂基兒（Gaile）與本地時裝設計師何志恩（Johanna）出席「天際100制服設計比賽」，以評判身份向參賽者教路，並即場發揮設計天分繪畫T恤。
澄清離婚傳言
前日Gaile稱不明白黎明（Leon）「唔好空肚食早餐」的金句，昨日她即主動向記者表示已解開金句之謎，她說︰「我問咗Leon喇！其實唔係你哋諗得咁深奧，佢話起身唔應該即刻食早餐，要飲少少水先，個肚會舒服啲，所以唔係乜嘢金句。」
對於早前有雜誌指二人離婚，她澄清並非事實，對傳聞亦不以為然︰「無所謂，香港嘅雜誌向來都好有創意，唔係寫我大肚就係離婚，Leon都無乜反應。如果我同佢離婚嘅話，你問我會答，就算有咁嘅事，都唔會係由雜誌寫出嚟，而會係由我個口講出嚟。（你哋仲係好Sweet？）一向都OK，又唔係好Sweet，我哋都結咗婚咯！」
大讚乞丐造型
提到設計制服，曾有設計經驗的Gaile認為設計制服難度較高，問到會否「恨」着制服﹖她坦言︰「我返學有着過，覺得着制服嘅人士好值得人尊敬。（會唔會幻想自己着制服﹖）冇，但我喺萬聖節着過警察同護士制服。（Leon着制服好唔好睇﹖）都OK，如果啱佢身形。」問到Leon哪個電影造型最好看時，Gaile甜到漏表示個個也不錯，記者笑言Leon在《火龍》的造型很邋遢，她依然大讚︰「都幾特別，就算佢喺《十月圍城》入面做乞丐，我都覺得幾好喎！」
文：名人組