楊秀惠預告糟質陳美詩
無綫新劇《萬凰之王》昨日試造型，陳錦鴻、宣萱、胡杏兒、馬賽、楊秀惠及陳美詩等皆有出席，雖然陳錦鴻、宣萱及胡杏兒等才是主角，但論風頭則不及孫耀威的新歡陳美詩與舊愛楊秀惠同場現身，美詩更「巧合地」飾演秀惠的妹仔宮女，玩味十足！秀惠更笑言定會「糟質」這位妹仔：「做得唔好會罰佢！劇入面美詩個角色心地好好，我成日屈佢，想佢死。（心底話？）唔係，我心地一向好！（係咪你做大佢做細？）哈哈，我係比較高大咋，所以（劇中）死先！」
美詩則坦言與秀惠合作不會尷尬：「佢係好好嘅同事，大家合作得好開心。（孫耀威知唔知你兩個合作？）佢知我拍呢套新劇，但唔知我有咩對手！」問美詩是否覺得對方「抵死」時，她醒目表示：「唔知，未睇劇本，（會唔會被秀惠掌摑？）唔知劇情需唔需要！（佢懷恨在心會真打？）唔會，懷咩恨呢，你哋多設計！」
胡杏兒首演王后
另外，宣萱表示不甚習慣穿起宮廷清裝，首次穿上時更忘了自己戴了頭飾因而撞牆；胡杏兒則首次演王后，她稱在劇中與宣萱大鬥法。
文：影視組