張燊悅粗身大細做司機
舊年先啱啱做咗人媽咪嘅張燊悅，話咁快又懷有第二胎，預產期係今年九月。八太早前喺中環見到腹大便便嘅張燊悅，與老公楊哲安同埋幾個朋友，柴娃娃喺餐廳度吹水飲紅酒，身懷六甲嘅佢見老公飲大兩杯，都係安全至上，寧願自己做司機載老公返歸！
張燊悅自從○八年嫁咗畀任職教育局政治助理楊哲安後，喺舊年一月就生咗寶貝女Lucy，之後仲淡出幕前，安心留喺屋企相夫教女，腳印印做個幸福少奶奶。做咗人媽咪冇耐嘅佢，咁快又就第二胎，唔知係咪有咗佗B經驗，見佢呢期佗得比之前輕鬆，行步路都靈活過人。
室外食飯熱辣辣
雖然睇住個囡囡一日比一日長大好開心，但係有時都要出去抖吓氣，輕鬆吓嘅！早前夜晚九點幾，八太就喺歌賦街見到張燊悅孖住老公，同埋幾位男女朋友，喺附近一間西餐廳晚膳。其實當晚嘅天氣都幾熱，大肚婆嘅體溫仲更加熱，唔知點解佢哋寧願坐喺out door，都唔揀有冷氣嘅室內嚟坐，真係睇見都滴晒汗！好在見佢哋都食得好enjoy，仲開咗幾支紅酒，邊食邊吹水，大家你一句我一句，不知傾得幾咁開心。
友人趁機摸大肚
見老公同朋友飲得咁暢快，張燊悅都唔執輸湊熱鬧咁飲番幾啖，直至凌晨十二點，大家都飲到有啲醉意，情緒高漲，其中有個男友人見到楊太個大肚，都忍唔住要企起身摸番幾下。埋單後，安全至上嘅張燊悅，見老公飲咗幾杯酒，就算個肚頂住軚盤，都寧願自己揸車載老公返屋企，認真抵錫！