祖兒地獄教官狠批師弟妹
容祖兒和古巨基為今屆英皇新秀歌唱大賽任「地獄教官」，祖兒自爆當年曾被師傅羅文狠批造型差，故寄語新人入行要有被人批評的心理準備，她亦會不留情面，有嗰句講嗰句。
祖兒、基仔、陳偉霆、鍾舒漫（Sherman）、洪卓立和泳兒昨日出席「英皇新秀歌唱大賽2010」記者會，今年英皇新秀首度與電訊網絡合辦，於八月三十一日在Star Hall舉行。祖兒和基仔獲委任為「地獄教官」，屆時會向進入十強的參賽者授訓。問到祖兒可會杜麗莎上身狠批參賽者？祖兒坦言：「都係有嗰句講嗰句，唔會轉彎抹角，有心入呢行就要聽真話。」當年可有被師傅羅文狠批？祖兒謂：「有架，話我造型唔得，應該可以好啲！但都未試過鬧到喊，佢好少好惡對我。」
基仔被星探兜搭
祖兒稱近日有空閒就會留在家中做「宅女」上網，很久以前試過「化名」上網打麻雀。可會上交友網睇靚仔？祖兒笑言：「每日都見唔少靚仔，仲使乜上交友網？我大多睇新資訊同聽歌，嚟緊十一月會開演唱會。」祖兒稱個唱形象會有新搞作，因很少以誇張的造型在台上出現。
至於基仔稱當年剛做《娛樂新聞眼》主持，在街上被自稱模特兒公司星探兜搭，更八卦心態膽粗粗跟對方上樓聽介紹，又話培訓做模特兒要收取幾萬元學費，最後他當然說冇錢走人。
鍾舒漫寫真過骨
另外，Sherman的寫真集爭贏o靚模順利入書展，她解釋是散文、繪本及寫真三合一，書內雖有比堅尼造型但並非賣點。對黃秋生用妓女形容o靚模，Sherman稱當然不太好，但都不便多表意見。
對於今屆新秀未有與無綫合作，英皇唱片及藝人管理部總監霍汶希表示與無綫關係良好，只是無綫現已有歌唱比賽進行，英皇則利用另一個平台來吸納其他參賽者，會向無綫買時段播出。
文：音樂組