周秀娜拒演狄娜 Carol飛撲執二攤
周秀娜一度落實扮狄娜演舞台劇《七擒七縱七色狼》，憑其「性感女神」稱號可謂當之無愧，可惜娜姐今時今日身價「大雞唔食細米」而推卻，監製楊紹鴻即轉而另覓「浸大Ｅ神」楊梓瑤（Carol）頂上，而Carol則不介意執二攤樂於演出。
周秀娜（Chrissie）早前已接洽明年一月演出《七》劇，日前製作單位與Chrissie及其經理人秘密會談，主要演員盧海鵬帶同狄娜當年的《七》電影DVD送給Chrissie。記者見鵬哥很耐心教Chrissie做戲，足足談了兩個小時才結束，歎完茶的Chrissie抽空去睇醫生，診治其因拍《殭屍新戰士》外景遭蚊蟲咬傷的「爛腳」。
撞正開拍新片
原以為Chrissie演硬「狄娜」，但昨日她的經理人證實，Chrissie因檔期不合而不能演出。問是否酬勞不理想？經理人Roy說：「着眼角色發揮嘅，主要係之前已傾緊一套電影，最後電影傾成，撞正一月拍，Chrissie擔心同時間做兩邊會演得唔好，唔想做壞自己個名，我哋聽完古仔好有興趣，如果楊生可以押後到四月可以坐低再傾。」Chrissie工作多多，昨又發現她首次穿古裝造型的照片上載微博，她稱原來為無綫拍一段廣告片。
Chrissie肥水不流別人田，一於推薦同公司的師妹新八模成員「翻版楊怡」余曉彤（Hidy）和「翻版范冰冰」何佩瑜（Jeana）給《七》劇監製楊紹鴻，可惜對方屬意「浸大Ｅ神」Carol演狄娜。身在泰國工作的楊紹鴻說：「話晒佢都係大學生，有書卷氣，又夠性感，演狄娜會較為接近，（唔怕o靚模形象唔好破壞狄娜形象？）因為舞台劇都要講噱頭。」
唔怕驗證真胸
Carol昨日回覆記者坦言有興趣演出，更不介意執二攤。她說：「暫時未收到通知，但我唔介意，呢個係難得機會，（有傳Chrissie因酬勞不合而辭演？）唔清楚，我就唔介意，睇角色發揮，狄娜係美貌與智慧並重嘅性感尤物，我睇過佢嘅戲，好激，自己未必可以咁大膽，真係要睇咗劇本先再講，（有傳你隆胸？）我唔介意去驗，因為我全身都真。」
文：影視組 攝：吳文聰