新八模MK洗街老少咸宜
新八模慘變書展炮灰，一心諗住推出Copybook借書還魂，可是貿發局昨日決定駁回其上訴，新八模亦打定輸數變陣出招，其中四位成員Mia、Jeana、Betrys和Suki前晚更以背心熱褲落旺角「洗街」宣傳，喪冧電車男一族！
貿發局在書展出招趕絕o靚模，「浸大E神」楊梓瑤、「百果園咪神」陳靜、周秀娜等全部冇得留低，連率先推出處女寫真的新八模也不能幸免！新八模原本希望推出五元Copybook，圖借書還魂在書展現身，可惜昨日貿發局已駁回其上訴，依舊勒令禁o靚模以任何形式現身書展宣傳！
龍友影唔停
為了刺激銷量，新八模惟有諗計自救，當中四位Mia、Jeana、Betrys和Suki前晚突襲旺角「洗街」，即被龍友360度瘋狂喪拍。雖然親臨熙來攘往的旺角宣傳，但四女毫不吝嗇性感，分別穿上背心或熱褲上陣。四人先到商場的書展視察銷情，又落手落腳把寫真放上書架，惹來不少途人圍觀。
四女又向不同年齡層面的人士sell書，最落力的Jeana更向小朋友和電車男大施冧功，當她俯身向小朋友介紹寫真時，事業線乍現，令龍友再次舉機狂影！最後也令電車男自掏腰包買下寫真。眾人之後又落行人專用區進行街訪，被訪問的三十人中，竟有逾二十五位支持她們的Copybook入書展，為眾女打下強心針。
經理人狂插
本報致電新八模經理人Roy，他表示出版商與貿發局交涉後，已得知「Copybook計劃」被貿發局擱置，他說：「其實唔關本書內容事，佢哋顧問團裁定只要同o靚模有關係刊物，一律唔畀喺書展出現。」他又狂插貿發局謂：「真係莫名其妙，如果佢哋已一早決定係咁，就唔好叫我哋交上訴書啦，浪費人力物力！」而新八模也齊聲感到失望，她們說：「都係求生存，點解要搞到後生仔女冇運行！」
文：專案組