徐子珊sing途觸礁變孤兒
歌影視三棲新貴徐子珊，去年憑首本名曲《Hit Me》熱爆樂壇，更橫掃樂壇頒獎禮多個女新人獎項，風頭一時無兩，但昨日突傳其唱片公司暫停唱片部運作，令子珊的大好歌途觸礁，慘變樂壇孤兒。
繼胡杏兒、鍾嘉欣進軍樂壇，徐子珊在無綫拉線下，於去年初正式宣布加盟恒藝亞洲唱片公司，而同公司女歌手還有可嵐。子珊去年憑着一首快歌《Hit Me》熱爆樂壇，加上其招牌式拍打PatPat誘人舞姿，成為圈中藝人模仿對象，子珊的處女唱片更奪「2009年度IFPI唱片銷量－最暢銷本地新人」及多個頒獎禮的新人獎，歌途可說無可限量。
揸弗人避正面回應
近年唱片業低迷，昨日突傳子珊所屬的恒藝亞洲唱片公司決定暫停唱片部運作，聽聞前晚唱片宣傳人員接獲公司解散的通知，被喻為樂壇女新人王的子珊，瞬間慘變孤兒，樂壇前路茫茫，暫未找到新東家。
本報曾聯絡恒藝亞洲的唱片揸弗人張德貴，查詢公司暫停唱片部運作一事，他坦白說：「可能係又可能唔係，因為公司正進行緊重組，（對歌手係咪有好大影響？）唔會，因為公司歌手唔多，但目前真係未知，下星期開會先知會點。」而該公司的一位高層宣傳人員則說：「係咩？你喺邊度聽番嚟？我唔方便講啲咩！」隨即匆匆收線。
子珊的經理人無綫製作資源部總監樂易玲則表示，子珊跟恒藝亞洲的唱片合約在五月已屆滿，樂小姐說：「我唔信佢哋暫停唱片部運作，相信係重組，因為兩個月前佢哋先搵我同何麗全傾過，仲透露公司有好多計劃。」據樂小姐所知，恒藝亞洲的投資者資金雄厚，只欠一個資深策劃人選推行唱片業務，而她亦有介紹人選給他們。
樂易玲：會再合作
樂易玲對子珊的歌途毫不擔心，亦表示子珊不會放棄唱歌，她說：「佢同公司申請咗八至十月到外地進修唱歌跳舞，佢依家忙緊拍劇同電影，唱片方面亦唔使操之過急，因為新人出第一張碟唔難，第二張碟要維持到好成績係好難，恒藝亞洲亦表明唔單止對子珊，對無綫旗下仲有一、兩個藝人感興趣，呢段時間我哋唔會將子珊簽畀其他唱片公司，等佢哋重組找到合適人選，我哋會再傾合作。」文：音樂組