葉童見記者交戲扮恩愛

葉童同老公陳國熹結咗婚廿年有多，兩個人前鬼咁恩愛，成日都孖住出席公開活動晒幸福，雖然多年嚟陳國熹成日畀人影到佢當街攬女，就算今年頭又同個中女喺中環ifc行街，兩個去到暗角位時仲又攬又啜，身為老婆嘅葉童一樣係撐老公撐到底，事隔一個月，兩公婆已經糖黐豆咁齊齊去睇音樂會。

通水立即有講有笑

早幾日八太就見葉童同老公去咗中環行街，唔知係咪重遊老公攬啜中女嘅舊地，葉童初時「吱」都唔笑唔單止，見佢同老公仲行到離行離列，兩公婆明顯冇乜嘢講，自己顧自己。

葉童之後同老公手拖手，仲有講有笑，成個幸福小女人咁款。

葉童同老公陳國熹去中環行街，不過就好似互不相識咁款，行到隔咗幾個身位。

不過邊行街邊四圍望嘅葉童就鬼咁眼利，冇耐就見到八太，葉童初頭都好愕然，但唔夠一秒就見佢拿拿聲「通水」畀老公知，見佢喺老公耳邊「吟」咗幾句，葉童就即刻主動拖住陳國熹，兩公婆仲突然話題多多，沿途有講有笑，葉童個樣仲交足晒戲，當堂幸福阿太咁款，攞過金像影后係唔同啲嘅。