克勤哭波喪夫唱婦隨

前晚世界盃舉行十六強賽事，當中最矚目是「英德大戰」，可惜英格蘭最後以一比四大敗出局，令不少粉絲心碎！圈中「首席」英格蘭球迷李克勤，前晚在微博上笑言：「如果有人要夾錢打球證，記得算我一份！」隨即獲趙學而、湯寶如及蔡少芬等附和。昨日克勤出席食物安全活動時，直言對英格蘭輸波感失望及氣憤，至於「打球證」事件，他謂：「我已經寫得好小心，都係話『如果有人』啫，都係發洩下，如果連咁嘅幽默感都冇就冇得好講！」

克勤又狂轟國際足協，沒有在足球上加入感應科技：「依家科技咁先進，太空都上到啦，點解唔可以呢？我覺得係特登唔加囉，世界盃真係好多人為因素，個球證話入就入唔入就唔入！不過都冇用，嗰球都唔會改變到事實！」

張繼聰比喻冇波睇就好似冇咗個仔。 （資料圖片）

全球網民為英格蘭的問題球掀起罵戰。 （美聯社圖片）

阿姐致電慰問

李太盧淑儀亦「同仇敵愾」在微博指旁證「發雞盲」洩憤，克勤力撐愛妻：「好多英格蘭球迷都失望！」他昨晨主持電台節目時，自爆英格蘭輸波後即收大批好友的「慰問」電話：「第一個係阿姐（汪明荃）打嚟，佢問我點解英格蘭踢成咁！」最後更要關掉手機「避世」。

張繼聰發晒茅

另一圈中英格蘭球迷梁漢文亦在微博上大嘆是「最唔開心嘅一晚」，樊少皇、曾華倩、農夫成員C君、方力申及劉浩龍等亦紛紛在微博上鬧爆該「問題球證」！張繼聰昨日出席樂施會活動時，自爆「英德大戰」期間屋苑突然收不到足球台：「好似行行下街唔見咗個仔咁，成個屋苑啲人都發晒茅！」太太謝安琪亦在電台節目上爆老公張繼聰因看不到足球，不停打電話鬧人。美國女歌手Katy Perry亦在Twitter上爆粗大罵球證：「點解唔用晶體感應器？個波一過就已經感應到啦！」看來英德大戰引發的怒火席捲全球！

文：音樂組