區俊濤最驚過關慘捱「酷刑」
歌手區俊濤（Toto）在嫲嫲心目中是最抵錫的乖孫，因每次嫲嫲要返家鄉新會，小時候的Toto都樂於相伴。雖然他覺得回鄉又玩又食是樂事，但一想起要在羅湖「罰企」兼做「人肉三文治」等過關，他就覺得是「酷刑」。
祖籍新會的Toto，童年時回鄉最密試過一年達三至四次，差不多有長假期便返新會度假。他說：「嗰時我大約八、九歲，其實我主要係陪嫲嫲返去，因為嫲嫲好鍾意返鄉下見親戚，咁我咪陪嫲嫲去囉。」近年Toto已減少回鄉，因嫲嫲年事已高，不宜舟車勞頓，加上鄉下的親戚生活質素提升，毋須嫲嫲再帶舊衫及生活用品。
鄉下單車冇安全感
問到喜不喜歡回鄉？Toto表示基本上喜歡，因為旅程不離吃喝玩樂，但最討厭是搭車回鄉過程，皆因當年交通不及現在方便。當年過關非常擠擁，Toto更以「受罪」來形容。他憶述：「以前返鄉下，唔似依家咁方便同好多選擇，全部人都逼喺羅湖等過關。我最記得有次喺羅湖，足足等咗三個鐘，人龍好似蛇餅，轉咗幾個圈，最慘係又逼又焗又冇得坐，諗起真係想死！」
不過回到鄉下，Toto即覺得進入另一個天地。他會和堂兄弟等到處玩，農曆新年會燒炮仗，夏天就餵雞仔及踏單車。他又指新會與香港的單車有很大分別：「聽我啲親戚話，因為唔想對腳掂地，所以專登整高啲，但我就覺得好冇安全感，怕會連人帶車一齊碌落地。」
特產食物最愛陳皮
Toto又指新會的家鄉特產以食物居多，有陳皮、陳皮酒、糖子薑及葵扇等。他對陳皮最有印象，皆因嫲嫲每次返鄉下，都會「大手入貨」購買陳皮，回港後再送給親友及鄰里。Toto大讚：「新會啲陳皮真係香好多，嫲嫲會用陳皮嚟蒸魚、煲湯同煲紅豆沙。」
文：音樂組