蔣怡開大冷氣對付o靚模
對於近日o靚模被逐出書展，昨出席世界盃節目的蔣怡卻另類提議。她說：「可以畀佢哋喺會場搞簽名會，但要劃開另一個區，仲要開大冷氣，等班o靚模着多啲衫。（畀人話低俗？）可以透過談吐令人改觀，其實o靚模最初出嚟係cute感覺，但直至今日已變質，就算畀人話低俗，都冇講錯。」
而新八模昨日在旺角宣傳寫真集，對於貿發局禁止o靚模在書展內舉行簽名會，她們均感失望，Hidy說：「十三個人就決定晒成件事，好唔公平，唔知點解覺得我哋低俗，我相信無人有資格批評一個人低俗定高尚。」而Hazel就說：「可能係因為有啲出版社嘅書銷量唔好，係陰謀，成件事好商業化。」
身為媽咪的Mia則說：「自己作為家長唔會教小朋友用低俗同高尚去品評人，咁樣會感到膚淺，眼光同胸襟會好狹窄。依家啲小朋友好聰明，就算唔教佢哋都會想接觸，作為家長應該陪佢哋一齊睇，如果愈隔絕佢哋會愈唔健康同愈反叛。」