JM施髮誘仔長短唔拘

Janice Man早前施魔「髮」拍廣告,更瞓身唔郁擺出甜美可人甫士,迷倒在場所有男工作人員。她不認同長髮女士較易吸引異性,短髮亦可令男士暈晒大浪。

樣子清麗甜美的Janice Man(JM)獲美國著名品牌REVLON垂青,拍攝全新染髮產品。拍攝當日,她以一頭鬈髮造型示人,十分優雅,散發着一絲絲的女人味。以tube top與浴袍上陣的她,大騷白滑細嫩肌膚,除了瞓身施展魔「髮」外,更甫士多多。

後悔剪短

JM說:「所有工作人員都笑我,可以瞓住拍咁舒服,但其實有苦自己知!因為我瞓喺度擺咗甫士都唔可以亂郁呀!」愛長髮的她曾把心一橫將秀髮剪短,令她後悔不已:「我自小就留長頭髮,最長仲留到近腰,嗰次剪到男仔頭,好唔鍾意!(係咪長頭髮易吸引異性?)其實女人要吸引男仔,長短髮都一樣。」

精力充沛

JM對自己要求十分高,每完成一個拍攝,便會走到電腦前看效果是否完美。她當日的嬌俏造型,吸引不少工作人員拿手機拍照留念。廣告拍攝接近尾聲時,所有工作人員均面露疲態,但她仍精力十足,還刻意地擺出多個甜美可人的甫士,令現場增添歡樂氣氛之餘,男性工作人員也暈晒大浪。