基仔出騷女友面青撐場
古巨基昨日為無綫節目錄影，之前被指「大肚」的緋聞女友兼助手Lorraine一臉倦容現身，期間不斷迴避鏡頭。基仔事後偏幫女友指怕鏡頭乃人之常情，對於Lorraine面青口唇白，基仔竟搞笑謂：「佢天生皮膚雪白啫。」
古巨基、鍾舒漫、官恩娜昨日為節目《2010年青少年暑期活動開幕》錄影，之前被指大肚的基仔緋聞女友兼助手Lorraine，昨日亦有出現，但卻不斷迴避鏡頭；基仔事後即幫口指怕鏡頭是人之常情：「之前佢都有出現，不過大家睇唔到。其實都澄清過好多次，邊度有（懷孕）呀！冇乜話避唔避傳媒，怕鏡頭係人之常情。佢係好驚記者鏡頭。」
讚女友皮膚雪白
對於是否叫Lorraine出來澄清，基仔撐女友說：「使乜！都冇咁嘅事，呢啲冇得呃，不過有攝記嘅地方佢係來去無蹤。」之後基仔更搞爛gag謂：「我敏感係望鏡頭，佢係閃。」談到Lorraine面青口唇白，基仔竟搞笑謂：「佢個妝化得太白。（好易畀人話冇咗喎！）唔關事，天生皮膚雪白啫。（你鍾唔鍾意？）見仁見智啦！」
同場的鍾舒漫與官恩娜都表示會在今年書展出書，談到𡃁模被禁入書展舉行簽名會，兼寫真被指低俗及教壞小朋友，鍾舒漫表示：「我覺得如果以靚同fashion嘅角度影寫真係值得一看，不過若覺得着泳衣同暴露就會紅，就唔太接受囉！」
官恩娜書展擺檔
官恩娜則表示：「機構有佢嘅規條，不過我都申請緊喺書展搞簽名會，但大會仲未覆。」另外鍾舒漫又指已加入娛樂圈的妹妹很叻女：「希望將來有機會合作，不過大家路線、聲線都唔同，佢玩嘢啲，可以着紗紗裙。」
文：影視組