陳志雲視方逸華世上至親
今年三月十一日，無綫總經理陳志雲與其他四位人士涉嫌貪污被廉署拘捕，震驚整個娛樂圈。事件發生至今逾百日，他終打破沉默接受本報專訪，憶述被捕期間的心情起伏，以及跟方逸華（六嬸）之間的「微妙」關係。
事件發生前，陳志雲於無綫身居要職，既能呼風喚雨，亦獲無綫老闆「六嬸」方逸華之信任與愛錫，可謂集萬千寵愛於一身。但事件發生後，一切突離他而去，更有傳是無綫向廉署舉報，就連六嬸亦知情，在他而言，卻沒有跌入人生谷底的感覺，他說：「呢件事唔係我人生谷底，到呢一分鐘以及將來，對我嚟講都覺得係雙親離世先係谷底，父母對我嘅成長影響最大。」
他續說：「ICAC事件我係用平常心去面對，就好似我喺記者會同大家講嘅一樣，人生上總會遇上一啲變化，令大家莫名其妙，但都唔好慌、唔好亂，我好感恩，父母嘅身教畀到我好積極嘅生活態度，如果經歷呢件事先過雙親離世，我最擔心嘅係父母，雖然好懷念佢哋，但好感恩呢件事發生喺佢哋離去之後。」
無牽掛反是祝福
自父母離世後，對陳志雲而言，無論在公在私，關係最親密的可說是六嬸。被廉署拘捕後，陳志雲曾被要求填上一位緊急聯絡人，他想了一會，填上了六嬸的名字。
陳志雲說：「我父母唔喺度，如果填朋友究竟填邊個呢？人哋會唔會喜歡你填呢？我真係諗唔到，在嗰一瞬間，唯一我淨係諗到方小姐，私底下佢係我好尊敬嘅長輩，工作上係一位好上司，我覺得佢唔會介意我填佢個名，（當佢係親人？情同母子？）我唔敢咁諗，唔敢高攀，心裏面一直對佢好尊重，永遠都會當佢係親人、長輩同朋友。佢經歷咁多，有豐富嘅人生閱歷，佢對我有一定了解，連我有幾多朋友佢都知。」
在出事的一刻，舉目無親，心裏難免感到難過，但陳志雲卻能坦然的面對，他說：「其實呢點一向我都知，上次去北極格陵蘭拍特輯嘅時候，有一個位完全收唔到任何訊息，同外界隔絕一樣，喺呢一刻反而覺得係一個祝福，因為我無任何牽掛，無親人牽掛，喺呢個位唔覺難受，只係實際上要考慮搵咩人，第一個考慮那個人會唔會介意，呢個考慮多於一切。」
消極 Vs 積極
「其實到依家我都唔覺呢件事係一個打擊，只當係人生閱歷的一部分，唔覺由個天跌落地之感覺。我成日帶住一個信念同提醒自己，有時在工作上遇到的朋友有兩種，一種工作上交往的朋友，一種係投契的知己，有時位在朋友在，唔在位人哋唔會再搵你。我成日提點自己，如果唔係退落嚟會好難受，由未退休提自己退休，由未死亡常提自己死亡，呢啲唔係消極，我係好積極去睇，當退落嚟時就唔會難受，咁我係咪由萬千寵愛變到無人過問？又唔係嘅，反而感到人間有情，由廉署攞番電話卡嗰時，見到好多好多慰問短訊，走喺街上好多市民表示支持，都令我好感動。」
其中最令他深刻是一次在商場見到一位婆婆，兩人當時搭電梯一上一落，婆婆見到他捉住他的手，場景猶如羅密歐與茱麗葉般，婆婆給予他好多支持，令他好感恩，自覺這一刻得到的愛比以前濃厚，因為發生了一個處境，給所有人表達對他的愛。
陳志雲向來感性，事發後他曾忍不住落淚，但他強調流下的只是感恩的眼淚：「感受到朋友嘅關懷同支持，當然亦有啲好熟又當唔識嘅人，但百分比佔好少，令我好感恩。」
文：影視組