千嬅台上婚禮歡迎丁生踩場

千嬅將於十月七日起在紅館舉行一連四場世界巡迴演唱會，日前千嬅為演唱會拍攝宣傳海報，服裝師Tomas相當搞鬼，特別為準新娘子設計了一系列婚紗禮服，穿上露肩結婚晚裝的千嬅，罕有地露出「事業線」，她笑說：「嘩！咁難得有少少事業線。」晚裝上的珠片由設計師親手逐粒釘上去，令千嬅愛不釋手，她說：「擺酒嗰晚可以着嚟敬酒添呀！」

積極修身

化身成潮爆新娘子的千嬅，梳了一個爆炸頭，她形容心情好興奮，為了個唱及婚禮，千嬅積極修身，每朝跑步、打拳、做gym，並跟足教練的營養餐進食，已成功減掉了五、六磅。看到Tomas為她設計的婚紗服飾，她笑說：「真係好靚，演唱會上都會考慮着婚紗演唱，（叫埋新郎哥丁子高上台？）睇吓佢夠唔夠膽嚟先啦。」拍攝現場有棵掛滿水晶的樹，寓意祝千嬅「開枝散葉」，她笑說：「幾有意思，大家咁話，生仔唔係話生就生。」

戴無價寶

此外，千嬅今次的演唱會獲周大福贊助鑽飾，拍攝海報當日，千嬅戴上為她而設的梨形鑽飾頸鏈、戒指及耳環，她笑說：「套鑽飾未有得公開發售，係『無價寶』，我都驚跌咗一粒半粒，（鍾唔鍾意鑽石？）有邊個唔鍾意鑽石？（叫丁子高買咗呢套畀你？）我諗佢自己識做，哈哈。」據知演唱會正式舉行時，鑽飾商更會加碼贊助，屆時紅館後台必定保安森嚴。

文：音樂組