Baby寧受壓力決不棄曉明
【戴佩玉深圳直擊】因與黃曉明傳緋聞而再度hit爆的Angelababy，昨日現身內地活動時雖然再三強調不回應與曉明有關的緋聞，又封口避談甜蜜探班一事，但仍盛讚曉明為人，還揚言不會因壓力放棄戀情。
與黃曉明的緋聞傳得熱烘烘的Baby，昨日身穿Miu Miu裙到內地出席《華娛六週年台慶暨十大亞洲紅人盛典》活動；雖然Baby悉心打扮，但面上卻爆滿暗瘡。Baby甫到場即惹來起哄，當被追問是否忙於拍拖？Baby無奈表示：「唔可以回應，因為我要保護身邊人同自己，亦都唔想再孭炒作黑鑊。」
自打嘴巴
由於曉明之前默認Baby女友身份，再加上「甜蜜探班照」在網上瘋傳，問到Baby能否以「明嫂」稱呼她時，她卻耍手擰頭謂：「叫番我做Baby親切啲。」雖然堅持要封口避談戀情，但Baby卻「自打嘴巴」直認與圈內人拍拖很難：「好有壓力，其實嗰啲所謂嘅傳情，只係媒體諗太多。」當被追問海綿蛋糕是否指曉明時，她竟一度語塞，曉明的男友身份呼之欲出！
談到早前甜蜜探曉明班，Baby則再三強調不想提及曉明：「唔講佢啲嘢，好有壓力，我依家嘅減壓方法係唔睇所有雜誌！」不過Baby卻表示沒有想過為壓力放棄戀情：「因為我係一個好堅強嘅人，我會諗辦法紓緩壓力。（fans支持拍拖？）佢哋好體諒，我都係一個人啫。」
生活開心
問到Baby不承認戀情怕否被指為「大話Baby」？她無奈謂：「唔識講。（依家感情生活OK？）我嘅生活好開心。（感情生活呢？）唔講，費事又畀人話炒作，總之唔講佢（曉明）啲嘢。」雖然Baby口口聲聲強調不談曉明，但當問到要兩地飛維繫戀情是否很難時，她卻表示：「我個個月都飛嚟飛去㗎啦！」又忍不住大讚曉明指：「佢好真誠，經過相處後發現佢好好人，好識保護身邊人。」 Baby又強調對戀情「有口難言」並非因曉明勒令封口：「我只係想專注工作上啲嘢啫。」