演技獲肯定 阿嬌韓影展征戰
鍾欣桐（阿嬌）及方力申主演的英皇電影《出水芙蓉》，獲韓國富川奇幻電影節邀請以觀摩電影身份參展。對於新片獲著名影展垂青，阿嬌興奮地說：「我仲以為呢個影展只對恐怖、驚慄題材感興趣，套戲花咗我哋好多心血，獲邀參展對我哋係一個肯定。」
明年有大突破
阿嬌有份主演的《前度》繼月前獲邀成為香港國際電影節閉幕電影後，再有電影入圍電影節，被讚演技進步的阿嬌說：「好記得劉鎮偉導演同我講，佢話：『演技係要時間磨練。』我希望今年喺電影上畀觀眾一個好印象，出年再有更大突破，好期望再同劉導演合作。」
小方則說：「我好鍾意影展嗰種隆重同星光熠熠嘅感覺，好希望為《出水芙蓉》再行紅地氈，同阿嬌及導演將套戲介紹畀韓國觀眾，觀眾睇呢套戲，會睇到一個從未睇過嘅我同阿嬌。」