杜如風喪玩喪食活在當下

新派旅遊節目主持人杜如風（Helen）憑夠放夠癲夠無厘頭的主持風格，火速成為追求不平凡的八、九十後的新偶像。性格直率的Helen向來有話直說，早前微博爆出「盆景貓」事件後，身為愛貓之人的她即時火爆留言抨擊，她說：「我嗰時完全唔知佢（唐貝詩）係邊個，嗰句嘢太真啦，同埋佢啲意識太恐怖，令我好激動！」她坦言即使知道對方背景，仍會作出同樣反應。

「巧遇」偉仔

《風行全世界》巴黎一站已到尾聲，不過Fans毋須失落，還有北京、新加坡、蘇梅島排住隊播出，Helen大讚北京之行令她流連忘返：「去到先覺北京係咁正，完全係Out Of Expectation，啲人好型好有態度，文化藝術氣息好重，覺得自己輸晒囉！」在新加坡亦讓她「巧遇」偶像梁朝偉兩次：「朋友帶我哋搵地道嘢食，去咗食海南雞飯同喇沙，估唔到兩間店外面都貼咗偉仔嘅相！」

放大圖片	放大圖片	放大圖片

認最愛自己

人氣急升引來廣告商招手，Helen早前獲博士倫邀請拍攝平面廣告兼為「愛自己」網上比賽擔任評判，對表演欲旺盛的她來說可謂完全冇難度。問Helen在生活中如何愛自己時，她搞笑地說：「旅行、買衫、食嘢，我真係好愛自己，我諗冇人可以愛我多過我愛自己，所以到依家都冇人要囉！」

老友晒冷

曾當電影編劇的杜如風在圈中人緣甚廣，與徐濠縈、黃偉文、何超儀等型人「物以類聚」、friend過打band！

化妝：Andy Leung@make360

髮型：Heibie Mok@Hair Culture

服裝：Izzue Collection

場地：Marco Polo Gateway Hotel

採訪：專案組