Mikki孭20磅金縷衣關人矮事
名模姚予晴（Mikki）與戴小奕為時裝品牌擔任模特兒，創作總監Massimiliano Giornetti親臨香港，兩人大讚他親民，而且凡事親力親為，Mikki更被欽點着上逾廿磅「金縷衣」，雖然分量十足，表現依然輕鬆自如。
前晚中銀大廈20周年誌慶隆重呈獻Salvatore Ferragamo 2010秋冬及2011早春系列時裝展，邀請三十多位模特兒演繹68套時裝，包括姚予晴、杜鵑、戴小奕等，為隆重其事，品牌高層及家族成員、創作總監Massimiliano Giornetti親臨香港主持大局。
設計師分配衣飾
本報獲邀採訪騷前後台情況，模特兒一早到場化妝整頭，其中有份參與的Mikki透露品牌今次揀選模特兒十分嚴謹，她說：「之前casting時已知品牌揀模特兒好嚴謹，有唔少casting咗好多次。」Mikki又表示第一次見Massimiliano，大讚對方說：「佢事事親力親為，好有自己要求，仲親自同我哋做綵排，我今次着兩套衫，其中有一套好重，一隻手都攞唔起，我諗超過廿磅。（件衫係設計師分配？）係，佢會睇番模特兒屬乜嘢類型，例如男仔頭就會多啲着褲，身形高嘅就着裙會好睇啲；我本來都唔算矮，但今次啲模特兒真係好高，好多都高過我。」Mikki雖然着上鑲滿金色鐵片的「金縷衣」，但依然表現淡定，行起貓步毫無壓力。
戴小奕紐約行騷
而另一模特兒戴小奕同樣大讚Massimiliano：「覺得佢好帥，好認真，我喺度試鞋，佢仲拎張櫈叫我坐低，佢個人好好，最重要係完全冇架子。」戴小奕又透露六月底去紐約做騷，趕不及回家跟父親慶祝父親節，所以一早已預備好禮物。
文：名人組