黃宗澤獲杏兒御准觀戰
黃宗澤（Bosco）、E Cup Baby劉欣宜（Miyoko）、李蘊、HotCha、張繼聰等昨日現身奧海城與信和集團商場推廣總經理蘇蔡潔蓮齊齊主持世界盃開球儀式，Bosco透露前晚因被TVB急召拍MV只能欣賞半場揭幕戰，至於有否與緋聞女友胡杏兒齊「歎波」？Bosco說：「佢唔好波，同埋大家都好忙，（有冇投訴？）四年一次，男仔都攞晒批准啦，睇波大過天，世盃都係個好藉口畀多年冇見嘅朋友聚吓。」曾言新碟賣過萬五隻即公開露點照，十五萬隻更晒股的Bosco，從助手口中得知銷路已達一萬，即笑言：「吓，我都係鍾意露股多啲！」
劉欣宜曾畀女追
此外，連日現身世盃活動的Miyoko、李蘊大唱新歌，變身中性的Miyoko自言被李蘊勾引摸全身，更言望反摸對方胸部，她說：「可以幫佢豐胸，但佢話自己冇質感，（點睇同性戀？）OK嘅，有畀女仔追過，但冇拍過拖，覺得愛情唔係睇性別，係睇feel。」
此外，英格蘭凌晨上陣世盃，HotCha說：「曾經都有因為碧咸靚仔捧英格蘭，今年佢因傷冇得上陣都好可惜，就好似我哋跳舞受傷一樣。」成員Winkie坦言因西班牙靚仔球員費蘭度托利斯而變節。
