王祖藍出動裸女濕鬥林峯

王祖藍7月30及31日在伊館舉行由英皇娛樂及無綫主辦的《咪咁扮嘢王祖藍演嘢會》今日正式開售，昨日祖藍先在記招上預演派笑彈，好友以短片送上恭賀，當中包括：曾志偉、古巨基、阮兆祥、鍾舒漫等，林峯在片段中笑問上年為自己個唱擔任嘉賓的祖藍是否嫌酬勞少，今年特意在同日開騷搞對抗。

公開性取向

被「踩場」的祖藍即向樂易玲「詐型」，笑指同是「親生仔」亦有大細超，他說：「人哋喺紅館，我就喺伊館，人哋拍劇有咩『S』、咩『G』做拍檔，我就得阮小儀，他朝一日佢喺『世界』，我應該喺『萬國』（殯儀館）。」

祖藍又將自己擺上枱，笑言公開拍拖全為澄清性取向，隨即拿出以長髮遮點半裸上身的祖藍紙牌，下身更是陳偉霆激凸造型，祖藍透露將施展渾身解數，運用所有在演藝學院學到的才能對撼林峯，他說：「大家都係偶像派客源一樣，佢係我最大威脅，我同佢做法一樣唔公開女友（佢有？）唔係，如果有，相信佢都唔會公開，惟有扮多啲女人，吸引單身男觀眾（點鬥濕身？）會有感動位，令觀眾喊到濕。」

吳雨攬祖藍非常肉緊。

王祖藍與一眾嘉賓開香檳預祝個唱成功。

提女友冧爆

提到女友，祖藍即大晒幸福，又笑言自己是「偶像派」不能公開戀情，他說：「依家唔可以完全公開，未夠成熟，保護多陣先啦，其實好耐冇見，但佢好體諒，冇揀錯！」冧爆的祖藍透露女友將「死忍」現身撐場，他說：「上個星期通電話，終於感覺到佢唔想我扮女人，佢話睇完唔知點，感覺好奇怪，但又話如果觀眾鍾意睇，可以帶畀人歡樂就繼續，真係好冧，唔好再講喇，再講溶喇！」

文：音樂組