莫少聰玉樹賑災遇車禍

莫少聰、孫興早前於內地遇車禍，記者致電莫少聰，他承認此事，表示：「我同孫興之前去玉樹賑災，因為時間急趕，我同佢分道揚鑣，因為今次我哋去一啲比玉樹更偏遠嘅山區，加上夜晚趕路兼落大風雪，公路上面嘅視野好唔清晰，孫興架車就係咁樣撞咗埋去前面架貨車度，幸好只係車爛咗，個人無事，而我去玉樹嘅時候，喺路上遇到一隊啱啱去完玉樹賑災嘅志願團體撞車，我就落去幫手救人，車啲傷者返西寧醫院，但可惜其中一個已經過咗身。」

莫少聰救完人之後，便再度起程入玉樹，今次再到災區的原因，是因上次代表演藝人協會與張家輝到玉樹後，被當地的志願團體感動。

莫少聰希望之後再去玉樹，並再帶多些物資前往。

孫興在賑災途中遇車禍，幸好安然無恙。

送上禦寒內衣

莫少聰表示：「我對青海、玉樹好有感情，上次我去嘅時候，見到啲志願人士無私奉獻，死慳死抵都要捐筆錢出嚟，出錢出力，我返到香港之後，即刻四圍再籌集善款，希望買多啲物資去賑災，好多演藝界嘅朋友都好幫手，今次我帶咗三千件禦寒內衣、二千件羽絨、一千多份日常用品上去，之後我都會再去，而且仲希望再帶多啲物資上去。」

文：影視祖