Lisa S.收金戒晚晚不設防
吳彥祖（Daniel）與Lisa S.結婚後，被指講心唔講金，豪宅及靚車皆沒老婆份兒，Lisa亦直指老公除婚戒外，沒送過鑽石給她。難怪吳彥祖趁着Lisa前日33歲生日，即出盡冧招補鑊，與她燭光晚餐並送上足金戒指作補償。
Daniel與Lisa上月於南非秘密結婚後，夫婦二人各有各忙，前晚適逢Lisa33歲生日，被指婚後無論是西貢的四千萬豪宅別墅及近百萬元的新款名車，統統沒有老婆份兒的Daniel，即趁機使出冧招補鑊，前晚約七時，Daniel與Lisa一齊乘坐早前購下的新款AUDIQ7啡色座駕，直往中環的歷山大廈的意大利餐廳撐枱腳。
十指緊扣歎意菜
Daniel與Lisa到達中環後，二人即十指緊扣步往餐廳，期間Daniel發覺忘記拿取送予老婆的禮物，急急折返車中取回首飾盒。當他見記者在場亦表現友善，問他除婚戒外未曾送過鑽石戒指，會否趁老婆生日作補償，他即說：「梗有啦，不過唔講得住，一陣佢就知喇。」二人享受燭光晚餐歎意菜，約兩小時後才手拖手步出餐廳，記者追問Lisa收到老公的厚禮開心否？Daniel即搶答：「佢梗係開心啦，我同佢結咗婚，我已經就係最好嘅禮物啦。」在旁的Lisa聞言即一臉幸福冧笑。
望明年與B慶祝
昨日Lisa出席新店開幕活動時，談到前晚和老公二人世界慶祝生日，她說：「我哋食咗好美味嘅意大利菜。Daniel送咗份禮物畀我，係好大隻嘅黃金戒指。其實佢幾日前有問過我想要咩，我話你時刻都可以送珠寶畀我，當我收到隻黃金戒指嗰刻好驚喜，真係好開心。」
Lisa坦言第一次以吳太身份過生日感覺很特別，她說：「通常我每年過生日都會唔開心，因代表自己又老咗一年，但今年係第一次無呢種感覺，覺得好開心，可能係我已經成為Daniel嘅太太，唔使再諗幾時嫁人，踏入人生另一個階段。」她更笑言和老公每晚都不設防很努力地造人，希望明年的生日有BB與她一起慶祝。
文、攝：追蹤組