黃翠如扮開懷有苦自己受
旅遊節目主持黃翠如（Priscilla）雖然經常在鏡頭前開懷地吃喝玩樂，但原來做旅遊節目主持一點也不好受，除了經常要遊飛機河，更十分容易增磅，令廿多年來從未受過減肥之苦的Priscilla亦大嗌「辛苦」！
黃翠如（Priscilla）自擔任生活品味及旅遊節目主持後，經常要周遊列國拍攝旅遊節目，雖然鏡頭前的Priscilla表現得精靈活潑，但原來「開心」背後要付出很多代價：「其實都幾辛苦o架，前排比利時同荷蘭連住咁去，舟車勞頓，雖然次次住嘅酒店都好靚，但可惜每晚喺酒店都只係留得四個幾鐘，不過呢份工其實已經好好，我都算係香港最筍嘅打工仔！（由電影跳番去做主持慣唔慣？）OK嘅，不過拍戲我都好鍾意，仲等緊機會o架！」
兩個星期減八磅
Priscilla還表示拍攝旅遊節目後，體重直線飆升，令向來「瘦底」的她大感失落：「早排有人搵我做代言，個價錢好吸引，但因為我肥咗成八磅咁多，所以變咗要喺兩個星期裏面地獄式咁減肥，真係好痛苦。（點減法？）唔食嘢搏命忍咯，好辛苦呀！我咁大個女都未試過覺得日子咁難捱。」問到甚麼廣告如此吸引？她即笑言：「萬寧醫學美容廣告。（酬勞好？）有成六位數。」
文：影視組 攝：黎志輝