李彩華有伴 半夜周街蕩
早前去咗內地拍劇賺人仔嘅李彩華（Rain），唔知係咪「餓」咗好耐冇得同班friend出去玩，搞到「蒲」癮發作，呢期成日喺夜店見到佢出沒。前排凌晨12點幾，八太就喺灣仔見到化行妝、set咗個靚頭嘅Rain，着住條短裙仔，同女性朋友喺酒吧林立嘅星街出現。
「夜麻麻」兩個女仔喺條街騰來騰去，仲邊行邊傾偈，之後就入咗去附近一間酒吧，唔知係咪嫌個場多人得滯，入咗去唔夠五分鐘又出番嚟，沿途見Rain仲不時手指指，行吓行吓，足足行咗十幾分鐘，最終選擇去咗金鐘一間酒店飲嘢。好在Rain個朋友都有番咁上下高，如果唔係跟住呢位長腿姐姐真係會行到氣咳o架！
