Amanda S.抽起條巾玩神秘
名模Amanda S.同男友Christian拍拖多年，兩人間中都一齊出活動，但早兩日八太見佢兩個去中環買黑超，兩人一齊試眼鏡，不過Amanda就好鬼避忌咁款，頻頻用圍巾包頭同遮面，兩個喺舖頭左試右試一輪，最終都係混吉走人。
Amanda S.近呢兩年除咗行時裝騷，又幫電視節目做主持，最近仲去法國學整餅，真係鬼咁忙。唔怪得Amanda唔使開工就陪男友，仲成日孖公仔出席公開活動晒恩愛。
包頭兼遮面
八太前兩日去中環行街時，就見到Amanda同男友Christian喺置地廣場shopping，享受二人世界，兩個喺商場嘅名店逛完一輪，就走咗入附近間百貨公司，八太見Amanda突然變得好避忌咁，同男友隔咗幾個身位，又用條圍巾遮面，甚至入到眼鏡店試戴黑超時，仲索性用條圍巾包住個頭，男友見到佢鬼祟成咁，都頂唔順埋去叫佢除咗條圍巾。
冇心水走人
Amanda乖乖聽話，Christian跟住攞起幾副黑超，同佢一齊試戴，兩人喺鏡前左照右照，Amanda轉頭又用圍巾嚟遮住口鼻，似乎好鍾意自己個造型，男友睇見都冇晒佢符，Amanda含情脈脈咁望住男友撒嬌，兩個「蜜蜜」斟一陣後，最後都揀唔啱心水，兩手空空走人。