沈卓盈遊日唔吼潮男

沈卓盈（Jessie）早前趁有空檔，便相約友人到日本福岡遊玩，除了爭取時間休息外，她更四出「覓食」及購物，結果足足肥了三磅返港，她說︰「之前次次去日本都係去東京，所以今次聽朋友嘅介紹，選擇咗福岡呢個地方，嗰度啲大型百貨公司都好多，仲拍得住東京嗰啲，所以我都買咗好多嘢返嚟香港，都算有收穫。」

趁夜蒲便利店

Jessie又表示除了購物，她亦吃得很開心，不論拉麵、和牛、串燒或是壽司，她都吃個不停，她笑言︰「食係最開心嘅，就算去到求其一間舖頭，啲嘢都好好味，連我咁瘦都食到肥咗三磅返嚟！」在今次旅程中，她表示由於每日都睡至下午起床，故很多值得遊覽的地方都沒有去，她謂︰「可能我瞓得太晏，所以都唔夠時間周圍遊覽，就算溫泉我都冇去浸，日頭行完街，夜晚我都係去蒲吓便利店、夾公仔同打機。」

沈卓盈笑言日本的男仔打扮實在太潮，不太適合自己。

沈卓盈喜歡吃東西，更肥了三磅返港，幸而她剩餘大把quota。

大談螢幕初吻

問此行有否艷遇？Jessie笑言日本男仔實在太潮，不太適合她，Jessie說︰「啲日本男仔都唔係好啱我，個個都留晒長頭髮，見到左眼就見唔到右眼，我都係鍾意啲正正常常嘅！」

此外，劇集《談情說案》快將出街，有份演出的她於劇中獻出了螢幕初吻，與馬國明有咀戲，問她拍時有否感到尷尬？她居然笑謂︰「佢（馬國明）仲緊張過我啦！」

文︰影視組