蒲精Suyen包場任影$660
近日港姐進行複試，身為水着組合Jelly Girls成員的張莉莎（Suyen）雖成功入圍，但被踢爆是蒲精一名，除了喜歡搞校服派對外，更是龍友之寶，一般私影只要$660就可以任影三小時！
經過港姐第二輪面試後，無綫為了去蕪存菁，悉數騎呢佳麗冇得留低！而有份入圍下一輪的佳麗身世逐一被大起底，去年憑水着而為人所熟悉的Jelly Girls，亦有「爛玩」成員Suyen參選。
從Suyen的Facebook發現，她全不忌諱把夜蒲照公諸同好，原來Suyen特別鍾情校服派對。上圍只有32B的她大晒三點式照外，又與男友人影密照。
不介意性感上陣
網上又發現Suyen的表演欲特別旺盛，愛參加歌唱比賽之餘，又做過張敬軒《曝光》MV女主角及出席多個酒吧騷。喜愛被人拍攝的她更是龍友的私影之寶，從網上的收費表顯示，只需$120，Suyen即可穿上背心熱褲任影，而三小時包場只收$660。
胸有成竹實入圍
記者致電起初不認參選的Suyen，她解釋：「因為之前好亂，又做緊嘢，所以答唔到呢啲問題！」對於入圍，她胸有成竹說：「有信心，只要解決到小問題就可以入圍喇！」而其經理人則表示會全力支持。對於有指Suyen爛蒲，Jelly Girls另一成員To To說：「佢OK啦，不過做港姐就要斯文啲，唔好咁爛玩！」
此外，港姐複試成焦點的「密實湯唯」，前晚面試完畢即回金巴利道某服務式住宅，看來其身世非富則貴。然而「黑超廖碧兒」亦有私家車接送。而洪天明舊愛梁郁霖（Lillian）則在Blog以「Support十卜」為題，為自己打氣。 文：專案組