家強怒插林楚麒 借家駒出位

家駒於93年在日本宣傳時從3米高台墮下，昏迷一星期後傷重死亡，當年林楚麒頭戴白花自封未亡人哭崩喪禮，事隔17年，下月10日是家駒48歲冥壽前夕，林楚麒宣布復出樂壇，簽過氣歌手莫鎮賢為經理人，連環接受傳媒訪問為月尾演出的音樂劇宣傳，有指她至今不忘家駒，願意為他梳起唔嫁，顯出一副癡心情長樣子。

佢唔好誤導歌迷

林楚麒對家駒癡心情長，至今仍念念不忘。（資料圖片）

家駒離世17載，他的歌聲仍長存樂迷心目中。（資料圖片）

然而，林楚麒的一番癡情剖白，卻嚴重地辣慶了家強，昨日家強到新城接受訪問，記者提到知唔知林楚麒復出？他不屑說：「睇到少少，叫佢唔好亂講嘢，叫佢小心啲。（你會採取行動？）我都講嘢佢就死。（你哋冇偈傾？）叫佢唔好講大話。」

對於有指林楚麒聲稱為家駒梳起唔嫁，家強連珠炮發地怒罵：「分手十世，唔好喺度扮未亡人，佢知乜事。（佢哋冇拍過拖？）朋友囉，拍拖係有，但分手十世，佢（家駒）之後仲有兩個女朋友，唔該佢（林楚麒），please！」

雖然死者已矣，但家強不忿有人利用亡兄做宣傳，他咬牙切齒地說：「梗係唔好（利用宣傳），佢哋分手年幾兩年，哥哥之後仲有兩個女朋友，佢（林楚麒）自己都知，仲要扮我阿哥係佢last一個，邊係，叫佢唔好誤導歌迷，當年佢對我阿哥唔住至分手。（有第三者？）唔講原因，我好憎佢，我阿哥憎佢所以我憎佢，佢知乜事，叫佢唔好再講，夠嘞！」

攞隻訂婚戒出嚟

對於有傳家駒和林楚麒於89年曾在Beyond其餘三位隊友面前訂婚，家強鄭重否認：「依家我阿哥唔喺度，所以我代阿哥講，叫佢唔好話自己同阿哥訂過婚，攞隻訂婚戒指出嚟囉，佢只係阿哥其中一個女友。」至於林楚麒電話飛留言信箱，至截稿前未回覆。

此外，家強將於下月聯同張學友、關淑怡舉行「他來自非洲慈善演唱會」，為非洲孤兒院籌建宿舍，屆時家強將與非洲小朋友合唱《遠方的朋友》。

採訪：音樂組