袁彌明露長腿巡名店

八太最鍾意行銅鑼灣趕潮流，早幾日去時代廣場Shopping時，就撞到同八太一樣咁鍾意扮靚嘅Erica，選美出身嘅佢靠喺網上教人扮靚一舉成名，仲開埋舖頭做老闆，嗰日八太見佢試護膚品，即刻喺隔籬𥄫吓，見佢又搽又聞，都好鬼認真吓喎。

專攻春裝

之後八太走咗上樓睇衫，轉頭又撞番Erica喺男裝部出現，佢係咁睇啲男裝恤衫，擺明想買畀男友，但好似唔多啱心水，睇完一輪都冇收穫，反而喺女裝部不停巡來巡去，試完高跟鞋又試衫，見到大批春裝就發晒狂，見佢好快就睇中一條熱褲，換上之後露出一雙白滑長腿，仲好有肉哋添，襯晒佢依家老闆身份。

袁彌明先到商場選購護膚品。

Erica似乎對短打情有獨鍾，試衫時露出一雙長腿。

試咗一條熱褲嘅Erica，喺鏡子前左照右照，又再攞第二條熱褲喺身上比併，顯得心大心細，之後，意猶未盡嘅佢轉攻吊帶裙同太陽帽，不停進出更衣室，絕對係一個天生扮靚狂，唔怪得可以靠扮靚搵食啦。

親力親為

八太見佢Shopping得咁高興，以為佢榮升咗老闆之後真係唔使做，不過，Erica行完街之後，就乖乖哋返美容店打躉，見佢喺舖頭執頭執尾，又親力親為招呼客人，生意都唔錯，唔怪得早排佢話計劃同男友夾份買樓做業主啦。