郭偉亮手口並用冧番扁嘴葉佩雯

葉佩雯（Grace）自從同咗男友郭偉亮（Eric）拍拖後，咁多年嚟佢都做Eric背後嘅女人，好少喺幕前出現。以為Grace同Eric拍咗拖咁多年，都差唔多會拉埋天窗啦，點知佢兩個都係冇乜聲氣，仲異口同聲話好滿意依家嘅感情狀況添。八太每次見佢兩個孖住出席活動時，雖然佢哋仲未結婚，但就成對老夫老妻咁款。

前幾日Grace同Eric仲拍住拖去咗中環行街街，嗰日都成夜晚七點幾，雖然天都黑齊，但見Grace仲戴住副黑超，同男友喺置地廣場附近嘅名店行咗一輪，不過就乜都買唔到。

去到影碟舖時，Eric上晒電咁一口氣揀咗成十隻碟，不過Grace見到就即刻制止佢「大出血」。

葉佩雯見男友付款，即嘴扁扁一臉不悅。

為買影碟鬧不快

兩個之後就入咗間影碟舖揀影碟，八太見Eric鬼咁開心，咩碟都睇一餐，仲擒擒青掃咗成十部八部戲，點知Grace見到佢「大出血」就即刻㩒住佢，Eric當然唔罷休，仲揸住啲影碟同女友講咗一大輪「道理」，施施然行去櫃枱畀錢，跟住佢後面嘅Grace當堂嘴扁扁兼面黑黑。

九秒九變糖黐豆

兩個之後行去蘭桂坊附近時，仲水溝油咁款，行到離行離列隔咗幾個身位，不過自知激嬲女友嘅Eric都好識做，「手口並用」氹番女友，見佢望住Grace講咗幾句後，又手郁郁咁示意女友拖番手仔，Grace梗係即刻冧晒啦，仲九秒九翹住男友手臂，兩個之後仲邊行邊傾，甜蜜蜜行入餐廳撐枱腳，冤氣到我八太都唔覺意打咗個冷震。