甄妮盡地一煲玩寸爆

殿堂級歌手甄妮在前晚母親節完成最後個唱,她寸爆樂壇新人冇禮貌,盡騷Quali的她驕傲地說:「我要喺最叻時候收工,冇人可以超越我。」

一連四場「甄妮愛SHOW FAREWELL WORLD TOUR」前晚圓滿結束,甄妮以超班唱功盡騷Quali,又請到林子祥(阿Lam)和林曉峰做嘉賓,阿Lam和甄妮合唱《世間始終你好》掀高潮,他還扮作眼甘甘望着穿低胸戰衣的甄妮,笑說:「想睇吓你係咪真係咁性感。」甄妮即不斷地胸壓他,逼到阿Lam節節後退,還取笑說:「你想返去畀老婆打Pat Pat呀?」

向仙姐朝唱

歌藝數一數二的甄妮更寸盡樂壇後浪:「依家歌手好幸福,我真係非常佩服,自己以前朝早八點就起身練歌,依家個個出唱片,都可以係最佳男女歌手,我哋以前對住前輩離遠五十步都鞠躬,但依家啲歌手見到我當唔識掂行掂過。」難怪前晚甄妮見到白雪仙捧場,即激動大叫:「仙姐。」還半踎半跪在仙姐面前唱歌,即場示範尊師重道一面。

見好就收工

之後甄妮還愈講愈激:「我從來冇埋堆,我適應唔到,個女出世時我許咗一個願,佢畢業時候就係我畢業,我唔想再做呀!」她邊哭邊說:「我係唔捨得,但天下無不散之筵席,我要喺最叻時候收工,要你哋永遠記住我,冇人可以超越我。」臨完場時,Melody上台獻花,兩母女相擁而哭,場面感人。

之後甄妮在慶功宴上表示:「我係落足好多力,提足精神唱歌,依家歌手最基本要學,得獎、攞第一名唔夠,要人哋話你好至得。」不過甄妮轉頭又補鑊說:「我開玩笑,唔好見怪,我點會係全世界最好,畀我吹吓水啦。」

文:音樂組