Mia坎坷潮媽血淚o靚模
昨日母親節，已為人母的郭可盈及名模Danielle都正享受當中喜悅，而新八模之一，有「港版Leah Dizon」之稱的o靚模陳靜儀（Mia）雖然只得21歲，但已是一對子女之母，縱使經歷過離婚等多重人生憂患，曾經精神崩潰，哭過痛過仍未放棄做模特兒的夢想，幸得現任男友郭秀雲兒子錢景峰照顧，這位另類潮媽已走出人生陰霾！
今年寫真戰即將爆發，新八模正式加入戰團！八女當中身份最為神秘的，莫過於被踢爆已有一子一女的Mia，她不但成為第一位o靚模媽咪，與錢景峰的一段情更成為焦點所在。原來年紀輕輕的她已經歷過結婚、生仔、離婚多個人生階段，身世之謎也逐漸曝光。
Mia日前為寫真試造型時，每當談及自己身世總是欲言又止，原來16歲已懷孕的她曾想過終止懷孕：「我真係諗過唔想生，但諗到生命係有價值，我係應該尊重同承擔個責任，所以我決定生個女出嚟！當時的確遇到唔少奇異眼光，但係我唔介意，生小朋友唔係壞事，我係唔會隱瞞！」
性格不合忍痛離婚
別人的眼光Mia從來不去理會，可是好友的離棄卻最令她心傷：「當時一個又一個好友知道我生小朋友覺得好震驚，佢哋逐漸對我離棄，嗰一刻真係令我崩潰，好彩有家人對我不離不棄，以前我唔覺得屋企人係最重要，我依家知喇，我生個女時一日嘔十次，成日入醫院，冇佢哋我諗唔會捱到今日！」
雖然有家人支持婚姻，可是Mia最終都與前夫分離，自為前夫誕下第二個小朋友後，Mia發覺跟前夫性格不合，最終忍痛離婚：「我覺得係對小朋友唔公平，但真係冇辦法，每個人命運唔同，我會承擔一切！」
Mia自言湊着兩個小朋友工作十分辛苦，未當o靚模前為家人的時裝店幫手，所以經濟沒有問題，但模特兒是兒時夢想，她強調不會害怕別人眼光：「生小朋友同入行冇關係，我唔會放棄，反而會更加珍惜！」但為了不想為小朋友帶來壞榜樣，Mia表示不會穿得太過暴露：「我唔會令自然形象畀人有太大遐想，動作會收斂啲！不過個女見我着得靚都會讚我，佢仲叫我幫佢化妝添！」對於郭秀雲指她應該不是愛兒錢景峰最後一個女友，Mia卻賣口乖讚未來奶奶Nice，男友對她十分支持，但希望把戀情低調處理。
Betrys慘變「獨眼龍」
此外，新八模今日會到澳門拍攝寫真，雖然成員之一的Vibeke（馬卓寧）未有到場，但無損七位小妮子試衫心情，Mia更與好姊妹Suki穿上比堅尼大方任拍，不時為對方整理服飾。可是另一成員Betrys卻因為早前落妝不徹底，搞到眼部發炎，慘變「獨眼龍」！
文：專案組