郭可盈有女萬事足遺忘母親節
世上只有媽媽好！今日母親節，第一年做媽媽的郭可盈，卻未有察覺今日自己是主角，只管訂枱為自己的媽媽慶祝，最後要郭母提醒可盈：「你都做咗阿媽！」
郭可盈年初與林文龍誕下女兒林天若（Tania），有女萬事足的可盈，以Taniababy來呼喚愛女，不過可笑是可盈竟忽略了自己已為人母，今日母親節，她只管訂枱為母親慶祝，及後要由自己母親提醒，才知道自己已是媽咪級，更要重組母親節慶祝成員，除了媽媽外，可盈更帶同女兒和老公文龍，三代同堂齊齊慶祝。
相機不離身
三個多月大的林天若，在可盈的人奶和奶粉哺育下，體重已達十八磅多，手、腳圓碌碌，猶如「節瓜人」般可愛，而樣貌方面，可盈表示女兒表情日日不同，為不想錯失每一個表情，她是相機不離身。可盈說：「我個女唔算好肥，但就真係食完就瞓，瞓醒就食，一覺瞓天光，我又唔使餵夜奶，所以我都有覺好瞓，狀態好好，（會趁狀態好追多個？）會架，不過我唔急，由個天安排。」
講英文單字
今日母親節，問可盈想收到女兒甚麼禮物？她說：「女兒健康我最開心，講讀書尚早，但學前班我都會幫佢揀，亦唔主張一日學十幾樣嘢，（女兒好活躍？）佢對聲、光好敏感，好鍾意講嘢，我同佢溝通，佢呀呀聲好積極回應，依家我同佢用廣東話講嘢，但見到雀仔、巴士都會同佢講英文單字教佢，等佢早啲入腦，其實學語言係緊要，但我都想個女學彈琴，因為我細個時好鍾意但冇學。」
文：影視組