林建名：分開拍拖好正常
林建岳女友Monica被拍得與一男士在台灣拖手約會，表現親暱，即傳出她與林建岳感情出現問題。記者昨日致電岳少兄長林建名，他起初力撐「哎吔弟婦」說：「拖手唔一定有問題，我時不時都會拖第二啲女仔嘅手，但都唔代表啲咩？睇吓咩環境啦，唔可以睇一張相就下判斷嘅！（話佢哋有錫喎？）咁錫又唔同講法，睇吓錫邊啦？錫面珠定濕吻先？（嘴對嘴？）我覺得錫吓面珠都OK，我有時都會錫啲好熟嘅女性朋友面珠，有時感激都會嘴對嘴，要睇佢哋點錫法囉！」
前妻謝玲玲：唔關我事
其後林建岳發表聲明，指早於兩年前已和Monica分開，林建名即改變說法：「咁如果佢哋分開咗，人哋拍拖都好正常，如果大家唔夾分開都唔係問題，不過個小朋友就辛苦啲囉，唔知跟邊個？最好就等個小朋友大個啲先分開，我自己都係等啲仔女大個先同老婆分開！」至於林建岳前妻謝玲玲則表示：「唔關我事，所以我唔回應喇！」