崔建邦出山示眾驚到震
張學友、黃家強及關淑怡將於6月舉行《他來自非洲》慈善演唱會，為「阿彌陀佛關懷中心」的教育項目籌款，幫助非洲孤兒，昨日兩位非洲小朋友來港出席記者會，即場清唱幾句學友的國語歌《祝福》，表達愛和音樂都是無分國界。
家強讚有愛心
早前家強和崔建邦到非洲探訪，家強指兩人因此加深了解，他說：「崔建邦個人好純真，係一個幾有愛心嘅男仔。」另崔建邦昨日為活動擔任司儀，他說：「今日正式面對群眾，感受深刻，不過上次做賑災騷壓力大啲，4、5個月冇上台真係震。」對於「志雲幫」被無綫逐一炒魷，問怕唔怕無綫跟他解約？他說：「唔擔心，隨遇而安。」崔建邦稱將為涉打女友案於18日上庭，他指和無綫有共識，會待案件完結後才再傾工作。
學友想訪非洲
學友表示演唱會當晚將與非洲小朋友合唱《祝福》，自己也想去當地探訪，他說：「我想等大女十一二歲同佢去探訪，老婆成日灌輸佢哋身在福中知識，叫佢哋要幫助其他小朋友。」問會否學鍾鎮濤父女檔合唱籌款？學友笑說：「佢個女有天分，上台識揸咪，我個女一定縮喺我背脊，唔得o架。（細女呢？）細女傻傻哋，控制唔到，隨時走出鏡頭。」
採訪：音樂組