唐詩詠隨時嫁
唐詩詠與崔建邦的戀情已成過去式，為免再受緋聞纏擾，她直言會將感情事保密。現階段單身的她寄情工作，但揚言不排除再跟圈中人墮愛河，更笑言隨時閃電結婚！
唐詩詠在剛播畢的劇集《鐵馬尋橋》中有不少慘情戲，到位演繹得到回響，她高興謂：「出街有唔少人叫我『阿雁』（劇中角色），自己一向做開刁蠻女，估唔到慘慘哋嘅角色觀眾都幾受落，畀咗自己一個演戲嘅新方向。」2000年憑《青春@Y2K》正式打入娛圈，今年踏入幕前工作第十年，她感嘆時光飛逝：「由最初做model到拍劇，轉變都幾大。一步一步走到依家每個過程都好難忘，見識多好多，亦識咗好多新朋友。」做過主持、拍過戲，現以拍劇為主的她相當安於現狀：「都幾滿意自己成績，入行十年，到今時今日都好有衝勁！」
最緊要心境後生
詩詠有着一張童顏，加上保養得宜，說她二十歲出頭不為過，但其實她即將踏入年齡新關口，但她笑言絲毫沒恐懼感：「年齡都係個數字啫，最緊要係心境後生，我覺得女仔有咁上下年紀先有味道，識得了解同照顧人先夠吸引！」雖然在電視圈有不少作品，但詩詠的緋聞始終最為人關注，令伊人難免氣餒：「有緋聞嗰時人哋睇唔到你嘅工作，當然會唔開心！但係冇法，惟有私生活低調啲，再拍拖唔會公開。」早前有傳她撻着黃嘉樂，她大笑謂：「唔使問都知係假啦！」單身的她揚言現階段只想跟工作拍拖：「依家多咗異性朋友，但我專注工作，睇唔到身邊人。（有人追？）我會Say No，想抖一抖，之前緋聞太多，唔好又嚟！」
再拍拖唔會公開
雖決意再拍拖不會公開，但詩詠直言結婚會公開，更不排除閃電結婚：「如果都到結得婚嘅階段就會公開，自己係睇心情做嘢嘅人，想做就去做，話唔定有日會閃電結婚！」與崔建邦的戀情已成過去式，問到詩詠會否願意再發展圈中情緣，她帶點支吾表示：「其實冇辦法去避免，鍾意就係鍾意，最重要對方有耐性同埋比我成熟，可以照顧我。」
圈中人有嘢講
《鐵馬尋橋》拍檔鄭嘉穎：「詩詠今年演技上進步好大，《鐵》劇個角色好適合佢，同佢演對手戲嗰時覺得佢發揮得好好。（睇好詩詠上位？）當然希望佢攞到飛躍進步女藝員，有獎始終係鼓勵。」
好友湯盈盈：「詩詠個人好乖，好努力，無論係同佢一齊做戲，定係喺電視上睇佢演出，都覺佢演技好有進步。私底下同佢相處覺得佢好真，性格都幾細路女！」
採訪：專案組
攝影：秦健輝
服裝、場地：Fornarina