熊黛林冧晒打邊爐慶功

模特兒熊黛林（Lynn）前晚自掏腰包在戲院包場邀請傳媒界，欣賞由她主演的《葉問2》，對於電影上映四日，在內地及香港的票房合共過億，她直言很驚喜，沒有想過幾日間已收逾億，問她會否請食飯慶功時，她笑言：「電影公司老闆肯定會請。（你請打邊爐？）可以，你哋鍾意啦！上映完就請。（有冇信心過三億？）應該會。（會唔會分紅？）唔關我事。（過三億着泳衣贈興？）唔關我事。」

微博傳情

提到郭富城表示會捧她場，Lynn即嬌嗔反問真定假，問她是否很開心，她甜笑說：「開心，咁即係話我哋嘅票房又會收多啲。（會唔會拍拖睇？）唔會，你哋唔好玩我啦！」另外，被問到二人在微博中傳情，Lynn面紅紅否認：「邊有呀！我寫自己嘢啫，所有人都睇到。（你哋有互相關注。）有呀，你哋睇到仲問。」

大肚被讚

對於外界指她在戲中扮演大肚婆似模似樣，她謙稱：「好開心，我自己知道有好多地方可以改進，但個個都錫住我。」不過，Lynn將「錫住」誤說成「食住」及「射住」，即時被記者取笑，她無奈地說：「你哋講到我好慶，好熱。」Lynn直言希望有更多演出機會，想做周迅喺《畫皮》中嘅狐仙角色，亦想做打女，因為有啲跳舞底子，但怕自己手太長，唔識就位。

文：名人組