唐寧前世欠落拯救流浪犬
向來對動物有無限愛心的唐寧，早前與一班善心人士，出席「拯救遺棄寵物中心」開幕活動，籌款為流浪犬在流浮山興建容身之所。已飼養數頭愛犬的唐寧，笑言將來擇偶也以愛狗行先，認真我為「犬」狂。
出名是愛狗之人的唐寧，雖然早前忙於演舞台劇及返內地拍劇，仍分心為流浪犬服務。早前唐寧與其他演藝人，包括海俊傑等出席了「拯救遺棄寵物中心」的開幕活動，呼籲善心人士捐款為流浪犬建設美好家園。
活動上，唐寧與狗狗們玩得相當盡興，更忍不住與其中一隻來個下巴貼鼻尖的「煙韌」動作，認真冤氣。雖然玩得盡興，但說到流浪犬的容身之所問題，唐寧即正色道：「呢個機構喺流浮山搵咗個地方畀班流浪狗住，仲買咗幾個大貨櫃安置佢哋，期間又有善心人士捐咗一批冷氣。不過由於裝冷氣要拖線，仲需要一大筆錢，所以我希望大家可以共襄善舉、慷慨解囊。」
寵物變主人
向來對狗狗情有獨鍾的唐寧，笑指希望將來退休後亦能做些服務狗狗的義工，她笑謂：「我覺得可能前世我畀啲狗救過啩，所以今世好似欠咗佢哋咁。好似我屋企嗰班大帝（指狗仔），我有時覺得佢哋似主人多過我似，因為我聽佢哋話多啲。（擇偶條件都要鍾意狗？）梗係，如果呢關都過唔到，真係唔使旨意做我男朋友。」
文：影視組