李逸朗搵命博半裸跳海

李逸朗在○八年以真名李威樂推出專輯後，今年終於再踏歌壇，推出全新專輯《給：愛我的》。近兩年未有出碟的他，心情零舍興奮：「我今次參與嘅部分好多，由構思到揀歌到唱片封套到MV，可以話係包辦晒！」喜歡作新嘗試的李逸朗，亦邀請新進音樂人合作，希望擦出不同的火花。他表示：「我自己都有參與填詞，MV就係我自己拍，真係好開心！」

鄭希怡客串MV

新碟以五首國語歌描述戀愛的過程，李逸朗更自編自導三首MV，他坦言已碌爆人情卡，找來好友泳兒及鄭希怡客串MV《誰》女主角：「個MV講我其實係個精神病患者，被泳兒打之餘仲要喺地下碌！鄭希怡就做我家姐，講佢嚟餵飯畀我食，但係我就掛住玩，個樣仲要好傻咁，拍嗰陣都有忍唔住笑！」

鄭希怡客串當李逸朗ＭＶ的女主角，鏡頭外二人笑不停。

扮演精神病人的李逸朗要被泳兒打。

呈現真實一面

除被泳兒打，李逸朗竟然玩跳海！在新歌《零》MV內，他獨自坐在海邊，將代表從前回憶的物件全拋下海，然後他脫去衫褲，僅穿內衣及三角內褲跳海。李逸朗謂：「我想表達個男主角唔想留低任何嘢嘅心態，有朋友問過我點解唔着Boxer要露底，其實私底下我都唔着Boxer嘅，我想將真實嘅我呈現畀歌迷睇！」

文：音樂組