楊汀叮睹虎爭食一額汗
Angelababy師妹楊汀叮熱愛旅遊，早前她與朋友組團到哈爾濱，除賞雪、食矜貴鱸魚外，又親眼目擊餓虎搶食生雞的殘忍場面，與老虎近距離接觸驚險萬分！
早前楊汀叮夥同十多個朋友到零下廿多度的哈爾濱享受一連五日的冰雪之旅，欣賞美麗雪景外，更得當地導遊帶路，捐窿捐罅搵美食，她興奮地說：「我哋食咗好多地道嘢，有農家菜、好入味嘅燜豬骨，仲有非常矜貴嘅野生鱸魚，喺其他地方好少有，所以我食咗好多，聽聞可以補充膠質。」
下一站馬爾代夫
吃喝以外少不了玩樂，汀叮到訪當地主題公園睇北極熊、企鵝，更跟北極狐狸親密接觸，不過要數最難忘的可謂遊覽規模於全球數一數二的東北老虎園，當日汀叮坐吉普車近距離觀察東北老虎：「開頭佢哋好靜咁坐喺度，但係我哋一放雞餵佢哋，啲老虎即刻瘋狂撲上去，嚇到我哋閂窗都閂唔切，真係好驚險，仲見到地下有羊嘅屍骸，其實都幾殘忍！」哈爾濱之旅令汀叮讚不絕口，問到下個目的地，她說：「想去馬爾代夫同埋夏威夷，去完啲落雪地方想享受一下陽光與海灘。」
文：專案組
攝：劉智源
場地：Mercury Cafe