王淑玲關婉珊拋胸搵銀
「美味天使」中的「香蕉」王淑玲與「蜜瓜」關婉珊，日前性感上陣拍攝纖體廣告，看來二人未有因「恩師」錢國偉涉貪失勢而令工作受影響，仍舊密密搵銀！
由《美女廚房》監製錢國偉一手捧紅的幾位「美味天使」，未有因對方捲入涉貪事件失勢而影響工作，日前「香蕉」王淑玲與「蜜瓜」關婉珊，更首次拍攝纖體廣告，期間她們以三個不同的性感造型示人，騷胸晒腿，大賣青春活力。
拒穿全身透視裝
當中以一襲性感低胸小背心上陣、勁騷「胸」湧身段的關婉珊，表示近日發福不少，就連上圍亦升cup，她說：「今次拍攝前都有做sit up、跑步減肥，但做咗《美女廚房》後真係肥咗好多，有啲朋友仲話我大胸咗，其實我本身唔鍾意咁豐滿，因為豐滿畀人感覺鹹濕啲，所以笑多啲『中和』吓。（夏天會否行泳衣騷？）如果纖到體都ＯＫ嘅，不過性感程度就有底線，最多係比堅尼，絕對接受唔到全身透視裝。」
想拍洗頭水廣告
至於以熱褲示人的王淑玲，則大騷性感美腿和肩線，伊人透露今次拍攝與上次所拍的泳裝寫真相比，簡直小巫見大巫，她說：「纖體廣告唔一定要好性感，太色情唔啱我哋年齡。（仲有咩廣告想試吓拍？）想拍洗頭水廣告，因為我啲頭髮好長，唔想嘥。」此外，提到「恩師」錢國偉近況，二人表示曾聯絡對方，錢國偉亦有透過ＳＭＳ回覆叫她們不用擔心。
文：影視組