張家輝西寧探孤雛心滴血

家輝行色匆匆，前日朝早由深圳乘機飛抵青海西寧，逗留不足廿四小時，昨即趕往北京公幹，打算今日返港亮相《演藝界情繫玉樹關愛行動大匯演》。青海之行令家輝感觸良多，他昨接受長途電話訪問謂：「全程都好難忘，特別係大會安排我哋去探訪幾間醫院，裏面我見到一個四歲嘅小朋友，同佢影咗張相大家都笑晒，背後其實係佢畀地震嚇驚到四日講唔到嘢，相信佢屋企人都已經凶多吉少，我唔敢問佢嘢，怕令佢諗起啲唔開心嘅事。」

食藥預防高山症

他坦言有醫院將急症室開放，安排大隊入內參觀及攝錄片段。家輝表示：「我唔敢入去，反而同行有女仔一支箭咁衝咗入去，佢出番嚟同我講，裏面嘅情形好心噏，啲災民唔係斷手就斷腳，個個都奄奄一息……」當地高山症相當嚴重，就連警察及醫生亦出現反應患上肺水腫：「佢哋個個大大隻，依家就呆呆滯滯瞓喺床度。（你冇高山反應？）我就係預咗會咁，所以事先食咗啲行血藥打底，都OK嘅。」由於有工作在身關係，大會原先公布家輝未能趕返港出席今晚的活動，但家輝謂：「我喺北京工作比想像中順利，所以一定趕返嚟歸隊，上台同廣大市民分享吓我嘅感覺。」

莫少聰任攝影師

至於莫少聰則充當攝影師，拿着攝錄機拍下大隊探訪時的點滴，實行「我機寫我心」，他說：「當地最缺乏嘅係帳篷，雖然每日都有空軍從天投下帳篷畀大家用，但始終都唔夠，玉樹好多傷者都被移送到西寧就醫，有好多人出現高山症，不過呢次嘅探訪，令我好感受到民族團結同社會和諧。」

據悉，今晚演藝界將雲集超過三百位紅星亮相，當中包括容祖兒、謝霆鋒、鍾欣桐、蔡卓妍、梁家輝、陳寶珠、張智霖、袁詠儀等，而內地演員張靜初將向電影劇組請假，傍晚時分到港參與呼籲，她表示想為同胞略盡綿力，大會安排她負責甚麼亦無所謂。

文：影視組