楊盼盼吳建豪10分鐘結緣

楊盼盼入行四十年，最先由演員轉做幕後便是擔任古天樂主演的《夜叉》、《少年犯》「電影總監」，她表示：「做總監主要是搵投資者，唔會過問有關製作嘅嘢，之後我覺得自己喜歡做電影監製多啲，因為可以參與埋製作。」

拍得住羅拉

當上監製後，楊盼盼拍過錢嘉樂主演的《無敵獎門人》、張慧儀的《以眼還眼》及原子鏸的《焚獸之都》、《極地皇陵》等，楊盼盼坦言很喜歡《極地皇陵》：「鄭佩佩都讚我拍得原子鏸相當之好，呢部片係去一個未開發嘅鐘乳石洞拍，當時我搵呢個景好耐，去到石洞嘅時候，一開燈就好似另外一個世界，好靚，但拍攝時遇到好多困難，單係電線嘅費用就已經用咗成五萬蚊，燈又要特製，成本唔少，但出來效果好好，我覺得呢部戲拍得唔差過《盜墓者羅拉2》。」

論到盼盼監製過的作品中，吳建豪可說是她的愛將，兩人曾合作過《功夫廚神》、《功夫無敵》等，盼盼直言最疼錫的演員是吳建豪：「吳建豪嘅身手好好，開《功夫無敵》嘅時候要練武一個月，即使好辛苦佢都無怨言，而且我每講一句話佢都會記住，加上佢係一個好感性嘅人，我覺得同佢好有緣。」

一度失聯絡

楊盼盼很欣賞吳建豪，05年開拍《功夫廚神》時便想找對方做男主角，可惜當時吳建豪與經理人公司有點問題，令盼盼跟吳建豪一度失去聯絡，直至08年電影必須開拍，她只好找台灣某藝人，對方亦已答允，但最後卻臨時扭計加價，令開拍受阻，與此同時有人搵到吳建豪，盼盼遂跟吳建豪講了十分鐘電話，結果一拍即合，終於拍成了《功夫廚神》。之後，盼盼跟吳建豪再合作《等着你回來之借室還魂》，並正洽談舞台劇《影子幽靈》，合作無間。

文：影視組