江若琳兩粒鐘放縱
江若琳（Elanne）日前與過百歌迷食自助餐慶祝歌迷會成立一周年，面對美食當前，fit爆的Elanne即放縱兩小時狂擦海鮮及魚生，食到肚脹脹的她高呼：「好耐冇食過自助餐喇。」
Elanne於08年成立歌迷會，原定去年底舉行一周年慶祝活動，可惜當時她忙為處女演唱會綵排，體貼的歌迷即表示待偶像有時間才舉行，雖然Elanne近日忙於拍攝古裝劇《洪武三十二》，但為免活動一拖再拖，日前特別抽空到酒店吃自助餐慶祝，逾百歌迷出席，場面熱鬧。
被fans餵飽
由於不少歌迷主動為偶像攞美食，搞到Elanne不停吃，她說：「其實我好鍾意食，但為咗上鏡好睇啲都食得好清淡，加上要拍電視劇更加要keep得好啲，已經好耐無食過Buffet喇。而且今次為咗同歌迷玩得開心啲，就放縱一次咁多。」並狂擦海鮮、魚生及甜品，喪食兩小時的Elanne頓時變成「小肥妹」。
之後她又與歌迷玩鬥快打短訊遊戲，最終由男歌迷勝出，Elanne還就延遲慶祝向歌迷道歉，全場歌迷即大叫「唔介意」，令她感動得眼濕濕。
文：音樂組