學友出招抱抱氹囡囡

謝安琪昨日以「饑饉之星」身份與鄧麗欣（Stephy）、鍾舒漫、陳偉霆（William）、陳柏宇及Mr.等「饑饉大使」出席揭幕禮，眾人即場除鞋以示支持，期間William將自己的鞋遞給Stephy及陳柏宇聞，十分百厭。

會帶女山區探訪

學友以打氣嘉賓身份神秘亮相，他的出現即掀高潮，並應要求清唱歌曲《Over The Rainbow》及《祝福》。問到學友兩個囡囡有否試過捱餓？他說：「會叫佢哋唔好嘥嘢，講係冇用，成日嫌啲嘢唔好食，搞到媽咪（指羅美薇）好嬲。」學友透露待細女張瑤萱大個少少便帶她到偏遠地方探訪。問到會否覺得兩個囡囡比自己細個更幸福？學友說：「唔係，我哋細個開心啲，跑吓山又一日，依家佢哋冇咁易開心。」

學友表示現時令兩女最開心是「抱抱」，他慨嘆說：「大女已經九歲，過多兩年就唔會再抱抱。」對於內地青海發生大地震，學友說已捐款：「自己唔識搞嘢，如果有人搞音樂會籌款，都會去幫手。」

鍾舒漫第一年參與饑饉營，而陳偉霆已是第三年出席。

陳偉霆十分百厭，將自己的鞋遞給Stephy及陳柏宇聞。

Kay玩黎明爛Gag

另外，Kay日前拍廣告因吊威吔搞到手臂內側瘀了一大片，刻意穿上束腰褲的她笑說：「用嚟束住肚皮。（有冇打定底？）冇，病咗兩個月，呢排都食得好清淡。」Kay透露最擔心今晚的閉幕音樂會，她說：「要唱成十幾首歌。」並引用金句王黎明「空肚食早餐」爛Gag，她說：「騷前我一定要食飽飽，依家都擔心唔知點算，未試過空肚唱歌，只係試過空肚食早餐。」

採訪：音樂組