朱璇國語演出打定輸數

08年中華小姐冠軍朱璇首次拍電影《淚王子》便獲金像獎提名「最佳新演員」，她對自己演技甚有信心，但卻睇好師姐陳法拉奪獎：「我呢部係國語片，相對冇咁着數。我已經睇晒其他對手嘅電影，特別睇好法拉，覺得佢演出好穩定，完全掌握到個角色。導演就睇好楊凡，希望佢可以攞獎。」朱璇又稱不太看重得失，故心情未算太緊張：「之前去過威尼斯影展參賽，雖然攞唔到獎，但已經係一次好好嘅經驗。」