阿嬌透支見暈舞爆甲

「Twins人人彈起演唱會」將於周五（16日）開騷，昨日在九龍灣排舞，阿嬌掛住一對黑眼圈及大眼袋現身，雖然疲態畢露，但仍落力綵排，她說：「我冇瞓呀，日頭排舞，夜晚band rehearsal，因為排到好夜，又要整理個人又要溫習。（太緊張？）都緊張，好多嘢要記。」

記者笑問阿嬌怕不怕個唱前「累」低？阿嬌即碌大眼說：「啋！我唔夠瞓啫，之前都有暈一暈，手指插落地指甲爆開。（減肥過度見暈？）我有食飯，體力OK，只不過攰。（想減幾多磅？）減到做騷為止，到時fit畀大家睇。」

我累了！	祖兒親臨為阿嬌打氣。

搞寸party

經理人霍汶希（Mani）大爆阿嬌在演唱會的戰衣好少布、好窄，看來阿嬌仍需努力。

剪了bob頭的祖兒和William撐場打氣，祖兒笑說：「我哋嚟搞寸party，頭先混入dancers堆中跳舞，舞興大發。」Mani指Twins開騷會請朋友上台玩，祖兒即鬼馬說：「我要預備平底鞋，平時着6、7吋高跟鞋，今次為咗尊重佢哋着平底鞋，佢哋係兒童樂園，要配合佢哋。」

好有女人味

至於William就送上止汗劑給師姐，踩場大賣廣告：「我做咗代言人，自己跳完舞，啲女同事都離我而去，覺得我好臭，噴完就好香。（Twins跳完舞都好臭？）佢哋唔臭，我係送畀dancers。」還擦鞋說：「Twins跳得好好，演繹進入第二個境界，好有女人味。」 文：音樂組